Smart #5 prezanton versionin Brabus me 637 kuaj fuqi

Smart ka prezantuar zyrtarisht Brabus-in e ri #5 – modeli më i fuqishëm dhe më ekskluziv në gamën e tij, përpara debutimit të tij në Panairin për automobila në Shanghai. Ky SUV elektrik me performancë të lartë është menduar për tregje të shumta ndërkombëtare dhe përfaqëson një hap të rëndësishëm përpara për markën që ishte e njohur më parë për automjetet e saj të vogla të qytetit.

Dizajn agresiv dhe pamje e veçantë Brabus

Dizajni i Smart #5 Brabus bazohet në versionin standard, por prezanton një sërë përmirësimesh vizuale dhe teknologjike që e veçojnë atë. Pjesa e jashtme përfshin rrota Brabus Monoblock 21 inç në dy ngjyra, detaje të kuqe dhe kalipa sportive të frenave, si dhe distinktivë të dukshëm të Brabus që njoftojnë se bëhet fjalë për diçka të veçantë. Dizajni agresiv, i kombinuar me linjat muskulare, sinjalizon qartë se ky SUV është i fokusuar në performancë.

Në brendësi, Smart ofronte teknologji luksoze dhe të avancuar me bollëk. Shoferi ka në dispozicion një panel instrumentesh dixhitale 10.3 inç dhe dy ekrane qendrore 13 inç. Timoni është i veshur me Alcantara dhe mban logon e ndriçuar të Brabus, ndërsa ulëset janë prej materialesh mikrofibër dhe Dinamica, me qepje dekorative të kuqe. Ulëset e përparme ofrojnë ngrohje dhe ajrosje, ndërsa pasagjerët në ulëset e pasme kanë edhe ngrohës. E gjithë kabina plotësohet nga një çati panoramike prej xhami, pedale sportive dhe ndriçim ambienti në 256 ngjyra.

Atmosfera e zërit plotësohet nga sistemi audio premium Sennheiser me 20 altoparlantë dhe më shumë se 2000 vat fuqi. Për dozë shtesë dinamike, Smart ka inkorporuar gjithashtu “modalitet Brabus” që simulon tingujt e motorit për përvojë më autentike drejtimi.

Performancë e fuqishme dhe karikim i shpejtë

Nën karrocerinë e aluminit është një sistem lëvizës me dy motorë elektrikë dhe fuqi totale prej 637 kuajfuqi (475 kW), e cila lejon Brabus #5 të përshpejtojë nga 0 në 100 km/h në vetëm 3.8 sekonda. Bateria 100 kWh siguron distancë prej 540 kilometrash sipas ciklit WLTP, ndërsa falë aftësisë për të ngarkuar shpejt me 400 kW, kapaciteti mund të rritet nga 10 në 80 përqind në vetëm 18 minuta.

Shitjet e Smart #5 Brabus në Gjermani fillojnë më 24 Prill, me çmim fillestar prej 60.900 euro. Ky model përfaqëson një epokë të re për markën Smart – epokë në të cilën dimensionet e vogla nuk nënkuptojnë mungesë fuqie, performance dhe prestigji.