Opel Mokka GSE Rally: Makina e re rally për të ardhmen e motosportit

Me fillimin e sezonit të pestë të ADAC Opel Electric Rally Cup, Opel ka zbuluar konceptin e automjetit të saj më të fundit dhe më të fuqishëm elektrik për rally – Opel Mokka GSE Rally. Ky prototip, me fuqi prej 207 kW (280 kf), ofron pamje të së ardhmes së sporteve motorike elektrike dhe konfirmon statusin e Opel-it në segmentin e makinave elektrike të garave.

Dizajn që tërheq dhe performancë që emocionon

Bazuar në modelin e prodhimit Mokka, Mokka GSE Rally e re vjen me pamje radikale rally dhe përmirësime teknike. Është i dallueshëm nga folia e tij ekstravagante me llogon ‘OMG! GSE’, frena të verdha përpara, rrota të verdha prapa, një vrimë ajrimi në çati dhe haube të zezë me mbishkrimin Mokka GSE RALLY.

Nën karroceri, makina mbart teknologji mbresëlënëse: një motor elektrik me 280 kuaj fuqi, 345 Nm çift rrotullues, diferencial me rrëshqitje të kufizuar me shumë pllaka, ndërrues shpejtësie garash dhe pezullim Bilstein me konfigurim të përforcuar McPherson. Ndihmat elektronike si ABS, ESP dhe kontrolli i tërheqjes mungojnë – të gjitha në emër të dinamikës së pastër të garave.

Teknologji e përparuar, e frymëzuar nga përvoja e Corsa Rally Electric

I zhvilluar bazuar në përvojën me Corsa Rally Electric, Mokka GSE Rally përdor një bateri 54 kWh nga versioni i prodhimit, me optimizim të softuerit për efikasitet, stabilitet dhe performancë konkurruese. Prototipi është ndërtuar me një shasi të lehtë dhe komponentë të përforcuar të sistemit të transmisionit për t’i bërë ballë kushteve ekstreme të garave.

Siguria në nivelin më të lartë

Ashtu si me Corsa Rally Electric, siguria është përparësi me Mokka GSE Rally. Automjeti ka roll-bara mbrojtëse të çertifikuar nga FIA, ulëse me rripa sigurie me gjashtë pika, një bateri të mbrojtur dhe sistem shuarjeje zjarri me agjent jo-përçues elektrik. Është integruar gjithashtu edhe Master Alarm Indicator, i cili menjëherë njofton në rast të një defekti ose përplasjeje të mundshme të izolimit dhe çaktivizon automatikisht sistemin e tensionit të lartë.

Ndryshe, Mokka GSE Rally është makina e parë e rally-t e zhvilluar sipas rregulloreve të reja eRally5 të FIA-s, që i mundëson të përdoret globalisht në gara të shumta kupash dhe gara për klientë që nga viti 2026.

Nga vizioni në realitet – sporti elektrik rally-t është këtu

Që nga viti 2021, Opel ka dëshmuar nëpërmjet ADAC Opel Electric Rally Cup se makinat elektrike të rally-t janë të shpejta, të sigurta dhe emocionuese. Me 63 pilotë nga 13 vende dhe 33 gara në gjashtë shtete deri më tani, interesi dhe pranimi i këtij lloji të sportit motorik është vazhdimisht në rritje.

Gara e radhës do të zhvillohet më 23 dhe 24 maj 2025 në Holandë, gjatë ELE Rally në Eindhoven, ku Mokka GSE Rally do të ketë premierën e parë në një tubim publik.