Markat kineze shënojnë rritje të shitjeve me 79% në Evropë

Shitjet e markave kineze të makinave në Evropë kanë shënuar rritje mbresëlënëse prej 79% në prill 2025, duke arritur në mbi 50,000 automjete të shitura, sipas të dhënave paraprake nga agjencia kërkimore Dataforce.

Edhe pse tregu i përgjithshëm evropian mbeti në stagnim me 1,085,000 shitje, prodhuesit kinezë e rritën pjesën e tyre të tregut në 4.6%, krahasuar me 2.6% në të njëjtën periudhë në vitin 2024.

BYD, Chery dhe MG – nxitës të rritjes

BYD regjistroi rritjen më të madhe absolute, me pothuajse 10,000 shitje më shumë krahasuar me prillin e vitit 2024, duke arritur në total prej 12,558 njësish. Pjesa më e madhe e kësaj rritjeje ishte për shkak të modelit Seal U, SUV hibrid plug-in i madhësisë së mesme, i cili kontribuoi me pothuajse 6,000 njësi vetëm në prill.

Nga ana tjetër, Chery arriti rritjen më të madhe në përqindje – 1.149% më shumë se vitin e kaluar, me 5,773 shitje. Kjo rritje u nxit nga nën-markat premium Jaecoo dhe Omoda, të cilat u lansuan në Evropë në vitin 2024. Për krahasim, Chery pati vetëm 462 shitje në prill 2024.

MG Motor, markë në pronësi të SAIC, mbetet marka kineze më e shitur në Evropë. MG regjistroi rritje prej 25%, me 21,735 automjete të shitura, të kryesuara nga modeli MG 3, i cili i vetëm kontribuoi në më shumë se 4,900 shitje gjatë muajit.

Në periudhën janar-prill 2025, MG kryeson me total prej 99,627 shitjesh, përpara BYD (41,409) dhe Chery (21,571).

Shitjet e automjeteve elektrike të ndikuara nga detyrimet doganore

Tarifat shtesë doganore për automjetet elektrike nga Kina, të cilat BE-ja i vendosi në nëntor 2024, po sjellin ndryshime në përzierjen e modeleve midis prodhuesve kinezë, duke e zhvendosur fokusin drejt modeleve plug-in dhe hibrideve të plota.

Në prill, shitjet totale të automjeteve kineze në Evropë arritën në 50,173 njësi, me çka:

• Shitjet e automjeteve elektrike (EV) u rritën me 41% (16,458 automjete)
• Hibridet plug-in shënuan rritje prej 534% (9,472 automjete)
• Hibridet e plota u rritën me shifër mbresëlënëse prej 3,946% (8,619 automjete)
• Shitjet e benzinës u rritën me 11% (13,786 automjete)

Marka të tjera kineze në tregun evropian

Geely Group, i cili përfshin marka të tilla si Lotus, Lynk & CO, Polestar dhe Zeekr (duke përjashtuar Volvo-n), regjistroi rritje prej 31% me 4,043 shitje dhe është prodhuesi i katërt më i madh kinez në Evropë.

Xpeng, me rritje prej 270% (1,665 shitje), po i afrohet DR Motor, kompani italiane që importon dhe shpërndan automjete të prodhuara në Kinë. DR pati rënie prej 15%, me 2,096 shitje.