Chery në prag të blerjes së fabrikave të VW-së në Gjermani
Prodhuesi kinez synon të zgjerohet përtej tregut të tij vendas, me plane për të prodhuar automjete nga disa prej markave të tij në Evropë.
Në një kohë kur tregu evropian i makinave po hapet gjithnjë e më shumë për prodhuesit kinezë, një nga kompanitë kryesore të Azisë – Chery – është në prag të një hapi historik me një blerje të mundshme të dy fabrikave të VW në zemër të industrisë gjermane të automobilave.
Dy fabrika gjermane mund të bëhen shtëpi të prodhimit kinez
Sipas raporteve të fundit, Chery – prodhuesi i katërt më i madh i makinave në Kinë, me mbi 2.6 milionë automjete të shitura në vitin 2024 – është në negociata të avancuara për të marrë përsipër fabrikat në Dresden dhe Osnabrück. Të dy lokacionet janë pjesë e masave më të gjera të Volkswagen për uljen e kostove dhe ristrukturimin e kapacitetit të prodhimit.
Edhe pse nuk është konfirmuar zyrtarisht nëse negociatat po zhvillohen drejtpërdrejt me Volkswagen, zëvendëspresidenti i Chery International, Charlie Zhang, për Autonews Europe tha se po kryhet një analizë e detajuar e të gjitha rregulloreve, sindikatave, zinxhirëve të furnizimit dhe kostove që lidhen me prodhimin potencial në Gjermani.
Prodhim lokal për markën e re evropiane Lepas
Nëse marrëveshja finalizohet, Chery planifikon të prodhojë modele nga marka e saj e sapokrijuar Lepas në fabrikat gjermane. E lançuar më 2 prill, Lepas është një markë e orientuar globalisht që ofron versione të modifikuara të modeleve SUV Tiggo. Midis automjeteve të planifikuara janë dy automjete kompakte dhe një SUV i madhësisë së mesme, të disponueshme me motor benzinë, hibrid plug-in dhe me sistem motorik tërësisht elektrikë.
Strategjia e shmangies së doganave
Ky veprim nuk është përpjekja e parë e Chery-t për të filluar prodhimin në Evropë. Që nga viti 2024, kompania ka filluar të montojë makina në ish-fabrikën e Nissan në Barcelonë, Spanjë, nëpërmjet një bashkëpunimi me kompaninë lokale Ebro. Sipas Zhang, Chery planifikon ta zgjerojë atë fabrikë për të rritur prodhimin e Tiggo PHEV, si dhe të shtojë versione elektrike të markave të saj Omoda dhe Jaecoo.
Me zgjerimin e mjediseve të prodhimit në Evropë, Chery jo vetëm që po pozicionohet për të shmangur tarifat e larta të vendosura nga BE-ja për modelet kineze të automjeteve elektrike, por gjithashtu po përpiqet t’i përshtasë produktet e saj kërkesave të konsumatorëve evropianë. Kjo qasje mund të jetë çelësi për zgjerimin e mëtejshëm të markave kineze në rajon dhe forcimin e ndikimit të tyre në skenën globale të automobilave.
