Alpine A290 Rallye është makina elektrike rally gati për aksion

Marka legjendare franceze Alpine ka zbuluar projektin e saj më të fundit – A290 Rallye, makinë elektrike rally e ndërtuar mbi bazën e modelit të njohur hot hatch A290. Me çmim prej 59,990 euro, ky version është i destinuar për entuziastët privatë dhe garat lokale të rallit, duke e mbajtur të ardhmen elektrike të markës në zemër të sportit motorik.

Nga asfalti në zhavorr – me 217 kuaj fuqi

Edhe pse ruan të njëjtin motor elektrik si A290 i pasagjerëve me 217 kf (160 kW), versioni Rallye vjen me një sërë përmirësimesh në sistemin e transmisionit dhe shasisë. Fuqia dërgohet në rrotat e përparme nëpërmjet një kufizuesi mekanik të rrëshqitjes ZF, duke mundësuar kontroll dhe stabilitet më të madh në terren të pabarabartë.

Pezullimi është ripunuar plotësisht me komponentë të ALP Racing, ndërsa makina lëvizn në rrota 18-inç Evo Corse të mbështjella me goma Michelin Pilot Sport A. Frenat janë përmirësuar ndjeshëm: nga 320 mm me katër pistona, në 350 mm me gjashtë pistona përpara, ndërsa sistemi ABS është akorduar saktësisht për garat e rally-t.

Siguri, performancë dhe shou

Alpine A290 Rallye është certifikuar sipas rregulloreve të FIA-s dhe vjen me kornizë sigurie të salduar dhe ulëse garash Sabelt. Një nga risitë më interesante është gjeneratori i jashtëm i zërit – sistem zëri që krijon tinguj sintetikë që ndryshojnë në varësi të shpejtësisë dhe pozicionit të pedalit të përshpejtuesit, duke ofruar ndjesi të dëgjueshme për spektatorët në skenën e rally-t.

Për më tepër, është instaluar një sistem freni dore hidraulik për drejtim më të lehtë në kthesa të ngushta, duke e bërë A290 Rallye vërtet të gatshëm për rrugë malore, baltë dhe zhavorr.

Montuar me dorë në Dieppe, Francë

Çdo A290 Rallye është ndërtuar me dorë në fabrikën e njohur të Alpine në Dieppe – Jean Rédélé Atelier Compétition. Edhe pse është rreth 40% më i shtrenjtë se modeli A290 për rrugë me të njëjtin motor, modeli Rallye ofron dukshëm më shumë në aspektin e performancës, besueshmërisë dhe ekskluzivitetit.

Evente dhe plane të ardhshme

Debutimi zyrtar do të zhvillohet këtë fundjavë në Rallye Rouergue Rodez Aveyron Oksitanie, pas së cilës A290 Rallye do të shfaqet edhe në Festivalin e Shpejtësisë Goodwood në Mbretërinë e Bashkuar, si dhe në Rallye Mont-Blanc Morzine.

Blerësit e A290 Rallye do të kenë mundësinë të marrin pjesë në një event ekskluziv të rally-t në Francë të mbështetur nga Alpine, i cili do të përfshijë mbështetje teknike dhe një rrjet të organizuar posaçërisht për karikimin e automjeteve elektrike.