Luca de Meo largohet, Renault Group do të ketë shef të ri

Pas pesë vitesh të suksesshme në krye të Renault Group, menaxheri italian Luca de Meo do të largohet zyrtarisht nga posti i Drejtorit Ekzekutiv më 15 korrik 2025. Sipas deklaratës zyrtare, vendimi u mor për arsye personale, me dëshirën për t’u përkushtuar sfidave të reja jashtë sektorit të automobilave.

Arkitekti i “Renaulution” largohet me mision të përfunduar

Luca de Meo ishte krijuesi i strategjisë së Renaulution, e njoftuar në vitin 2021 – një plan transformimi që përfshinte elektrifikimin e gamës së modeleve, lansimin e modeleve të reja elektrike dhe hibride, rimëkëmbjen e Renault 5, si dhe orientimin e plotë të Alpine drejt segmentit EV. Në të njëjtën kohë, ai konsolidoi pozicionin e Dacia-s si një markë buxhetore me rritje të qëndrueshme.

Bordi i Drejtorëve e falënderon, ndërsa pasardhësi do të shpallet së shpejti

Bordi i drejtorëve të Renault falënderoi de Meo për udhëheqjen e tij dhe tha se kishte filluar procesin për të zgjedhur drejtor të ri ekzekutiv, bazuar në një plan të paracaktuar të trashëgimisë. Emri i drejtorit të ri ekzekutiv do të shpallet më vonë.

Destinacioni i ri: grupacioni luksoz Kering

Gazeta franceze Le Figaro raportoi se de Meo, 58 vjeç, do të kalojë në grupacionin luksoz Kering, pronar i markave të tilla si Gucci, Yves Saint Laurent, Balenciaga dhe Alexander McQueen. Grupi është përballur me rënie masive prej 77% të vlerës së aksioneve që nga viti 2021, që do të thotë se udhëheqësi i ri do të duhet të zhvillojë një strategji kthese.

“E kemi bërë të pamundurën”

Në një deklaratë, Luca de Meo tha:

“Vjen një moment në jetë kur e di se puna është bërë. Në më pak se pesë vite, ne jemi përballur me sfida të mëdha dhe kemi arritur atë që shumë mendonin se ishte e pamundur. Sot, rezultatet flasin vetë – ato janë më të mirat në historinë e kompanisë”.

Ai shtoi:

“Kemi ekip të fortë, një organizatë fleksibile dhe një strategji për gjeneratën e ardhshme të produkteve. Është koha që unë të dorëzoj stafetën. Po largohem me besimin se po lë pas një kompani të transformuar, gati për të ardhmen.”

Përvojë e pasur në industrinë e automobilave

Para se t’i bashkohej Renault, de Meo mbajti role drejtuese në disa kompani të mëdha automobilistike, duke përfshirë Seat dhe Cupra brenda Grupit Volkswagen, si dhe angazhime të mëparshme në Fiat, Abarth dhe Alfa Romeo gjatë kohës së tij në FCA.