Antonio Filosa është drejtori i ri gjeneral i Stellantis
Antonio Filosa është emëruar drejtori i ri ekzekutiv i Stellantis, ndërsa do ta marrë këtë pozicion më 23 qershor të këtij viti.
Pas disa muajsh kërkimi intensiv, bordi i drejtorëve të Stellantis ka zgjedhur unanimisht Antonio Filosa si drejtorin e ri të përgjithshëm të kompanisë. Ai do të marrë zyrtarisht detyrën më 23 qershor 2025, duke i dhënë fund periudhës së pasigurisë pas dorëheqjes së Carlos Tavares në dhjetor 2024.
Udhëheqës me përvojë brenda kompanisë
I lindur në Napoli të Italisë në vitin 1973, Filosa ka 25 vjet përvojë në industrinë e automobilave. Ai e filloi karrierën e tij në Fiat në vitin 1999 dhe përmes pozicioneve të ndryshme drejtuese, arriti në majë të Stellantis. Në vitin 2018, ai u emërua Drejtor Ekzekutiv i Fiat Chrysler Automobiles (FCA) për Amerikën e Jugut, ku udhëhoqi zgjerimin e suksesshëm të Jeep në Brazil.
Pas bashkimit të FCA dhe PSA në vitin 2021, Filosa vazhdoi të drejtonte Amerikën e Jugut, ndërsa nga nëntori 2023 deri në shkurt 2025, ai ushtroi detyrën e drejtorit të përgjithshëm të Jeep, duke u përqendruar në rritjen e shitjeve dhe praninë e markës në Evropë.
Si pjesë e riorganizimit të fundit të menaxhimit, pas largimit të Tavares, Filosa u promovua në drejtor operacional për Amerikën dhe drejtor i cilësisë.
Sfidat në një kohë të paqëndrueshmërisë ekonomike
Emërimi vjen në një kohë kritike për Stellantis. Kompania shënoi rënie prej 70% të fitimeve në vitin 2024, gjë që krijoi presion serioz për të ristrukturuar dhe për të rifituar pozicionin e saj në treg. Filosa kishte thënë më parë se tregu i shitjes me pakicë në SHBA ishte përparësi kryesore, duke treguar strategji agresive për të stabilizuar të ardhurat.
Drejtori ekzekutiv i Stellantis, Xhon Elkann, i cili do të mbetet në rolin e tij, tha:
“Kam punuar ngushtë me Antonion gjatë gjashtë muajve të fundit dhe kam parë udhëheqjen e tij të fortë dhe efektive në një kohë sfidash të pashembullta. Ai është personi i duhur për këtë pozicion”.
Fokus te njerëzit, brendet dhe klientët
Në deklaratën e tij të parë si drejtor ekzekutiv i ardhshëm, Filosa falënderoi besimin dhe theksoi rëndësinë e njerëzve në Stellantis, si dhe fokusin e tij te klientët:
“Ne kemi talent, pasion dhe përkushtim të jashtëzakonshëm. Suksesi i Stellantis do të vazhdojë të bazohet në markat tona dhe fokusin tonë te nevojat e klientëve.”
Kur të marrë zyrtarisht detyrën më 23 qershor, Filosa pritet të prezantojë ekipin e ri të menaxhimit, i cili do të përcaktojë strategjinë e ardhshme të një prej konglomerateve më të mëdha të automobilave në botë.
